زاوئیے سوچ کے بدلیں گے جدھر جائیں گے

 غزل
شاعر: ڈاکٹر شوذب کاظمی کی غزلیں

زاوئیے سوچ کے بدلیں گے جدھر جائیں گے
فکرِ نو ساتھ لیے اہلِ ہنر جائیں گے

کہہ دیا کس نے ، کہ ٹوٹیں گے بکھر جائیں گے
چھوڑ کر نسلوں پہ ، بھرپور اثر جائیں گے

جس طرف جائیں گے ہم ، سینہ سِپر جائیں گے
اور ہیں ، جو کڑے لمحات سے ڈر جائیں گے

کب یہ سوچا تھا کہ یوں پریم نگر جائیں گے
دور سے ہاتھ ہِلائیں گے ، گزر جائیں گے

ہم سے درویش صفت ، پار اتر جائیں گے
تیرے بخشے ہوئے ، سب زخم بھی ، بھر جائیں گے

بّوترابی ہے ، تو مت سوچ ، اے پیوندِ تراب
*مر کے بھی چین نہ پایا تو کدھر جائیں گے* 

سوچتے ہی نہیں ، دولت کے بڑھانے والے
یہ محل ، مال منارے یہیں دھر جائیں گے

چاندنی راتوں میں ، اکثر یہ خیال آتا ہے 
یہ ستارے مری آنکھوں میں اتر جائیں گے

دُور اُفتادہ جزیروں پہ بھی اک دن ، شوذب
ہم حسیں موسموں کی لے کے خبر جائیں گے

📢 Join our WhatsApp Channel for latest news and updates! تازہ ترین اپڈیٹس کے لیے ابھی اُردو انسائیٹ کے وٹس ایپ چینل کو فالو کریں