محمد شاہ رخ فیروز قادری

 محمد شاہ رخ فیروز قادری

پیدائش اور ابتدائی حالاتِ زندگی

محمد شاہ رخ فیروز قادری ایک باعمل اور متحرک سماجی شخصیت ہیں، جن کی پیدائش 3 فروری 1990ء کو کراچی، پاکستان میں ہوئی۔ ان کا نسب یوں ہے: محمد شاہ رخ بن فیروز الدین، پوتے حاجی بشیر احمد، پردادا سہیل محمد اور پردادا کے والد خدا بخش۔

شرفِ بیعت

سن 1998ء میں محمد شاہ رخ فیروز قادری کو معروف دینی رہنما حضرت علامہ سید شاہ تراب الحق قادریؒ کے دستِ حق پرست پر سلسلۂ قادریہ رضویہ میں بیعت ہونے کی سعادت نصیب ہوئی۔

حضرت علامہ سید شاہ تراب الحق قادریؒ کو مفتیِ اعظم ہند، علامہ مولانا مصطفیٰ رضا خان نوریؒ کی جانب سے اجازت و خلافت حاصل تھی، جبکہ وہ ممتاز مصلحِ ملت علامہ قاری محمد مصلح الدین صدیقیؒ کے خلیفہ اور جانشین بھی تھے۔

خاندانی و برادری پس منظر

محمد شاہ رخ فیروز قادری کا تعلق کراچی کی معروف رنگریز برادری سے ہے، جو “انجمن قومِ سکندری” کے نام سے باقاعدہ رجسٹرڈ تنظیم ہے۔ اس انجمن کا قیام 1988ء میں کراچی میں عمل میں آیا۔

قومِ سکندری کا اصل وطن دہلی (بھارت) ہے۔ 1947ء کی تقسیمِ ہند کے بعد یہ برادری ہجرت کر کے کراچی آئی اور صدر ٹاؤن کے علاقے میں آباد ہوئی، جہاں آج بھی اس کے افراد مقیم ہیں۔

بلدیاتی سیاست میں عملی شرکت

محمد شاہ رخ فیروز قادری کا آبائی و رہائشی تعلق کراچی ضلع جنوبی کے علاقے نانک واڑہ سے ہے۔ بلدیاتی نظام کے تحت اس وقت ضلع میں 31 یونین کونسلیں موجود تھیں، جہاں ہر پانچ سال بعد چیئرمین، وائس چیئرمین اور چار جنرل کونسلرز منتخب کیے جاتے تھے۔

2015ء کے بلدیاتی انتخابات میں علاقہ معززین کے اتفاقِ رائے سے انھیں یونین کونسل 23، وارڈ نمبر 1 سے جنرل کونسلر کے امیدوار کے طور پر نامزد کیا گیا۔ انھوں نے “خوش حال کراچی پینل” کے پلیٹ فارم سے آزاد امیدوار کی حیثیت سے انتخابی عمل میں حصہ لیا اور 255 ووٹ حاصل کر کے دوسری پوزیشن حاصل کی۔ اگرچہ وہ کامیاب نہ ہو سکے، تاہم اس دور میں ایم کیو ایم کے مقابل انتخاب لڑنا ایک جرات مندانہ اقدام سمجھا جاتا تھا۔

بعد ازاں 5 نومبر 2023ء کو نئی بلدیاتی تقسیم کے تحت یونین کونسل 6 نانک واڑہ میں وائس چیئرمین کے ضمنی انتخابات میں بھی حصہ لیا، جہاں 6 امیدواروں کے درمیان مقابلے میں وہ دوسری پوزیشن پر رہے۔ اس انتخاب میں ان کے مدِ مقابل منصور شیخ تھے۔

جماعتِ اہلِ سنت پاکستان میں تنظیمی ذمہ داریاں

جماعتِ اہلِ سنت پاکستان کراچی اور ملک بھر میں اکثریتی سنی برادری کی نمائندہ جماعت سمجھی جاتی ہے۔ کراچی کے امیر ممتاز عالمِ دین علامہ مولانا سید شاہ عبد الحق قادری ہیں، جبکہ کراچی ڈویژن کے ناظمِ اعلیٰ سید محمد رفیق شاہ ہیں۔

محمد شاہ رخ فیروز قادری جماعتِ اہلِ سنت کے سرگرم اور متحرک رکن ہیں۔ 23 اکتوبر 2022ء کو ضلع جنوبی کے ناظم علامہ شوکت حسین سیالوی نے انھیں جماعتِ اہلِ سنت پاکستان کراچی ضلع جنوبی کا ڈپٹی ناظم مقرر کیا۔ بعد ازاں 4 مئی 2025ء کو جماعتِ اہلِ سنت پاکستان کراچی ڈویژن کے انتخابات کے موقع پر انھیں کراچی ڈویژن کا سوشل میڈیا انچارج نامزد کیا گیا۔

نعتیہ یوٹیوب چینل

محمد شاہ رخ فیروز قادری کو نعتِ رسول ﷺ سے قلبی لگاؤ حاصل ہے۔ اسی دینی ذوق کے تحت انھوں نے “Muhammad Shahrukh Qadri” کے نام سے ایک نعتیہ یوٹیوب چینل قائم کیا۔

یہ چینل نامور نعت خوانوں کی قدیم اور نایاب نعتیہ ریکارڈنگز کو محفوظ کرنے اور نعت کے شائقین تک پہنچانے کے لیے وقف ہے۔

انجمن قومِ سکندری کے الیکشن سیل میں کردار

محمد شاہ رخ فیروز قادری انجمن قومِ سکندری کی فلاحی و تنظیمی سرگرمیوں میں مسلسل سرگرم رہے ہیں۔ انجمن کے انتظامی معاملات کے لیے ہر دو سال بعد انتخابات منعقد کیے جاتے ہیں۔

20 نومبر 2021ء کو منعقدہ جنرل باڈی اجلاس میں مشاورت کے ذریعے انھیں انجمن قومِ سکندری کے الیکشن سیل کا رکن منتخب کیا گیا۔ بعدازاں 14 جولائی 2024ء کو بعض اراکین کی جانب سے ضابطہ اخلاق کی خلاف ورزی اور انتخابی بے قاعدگیوں کے خلاف احتجاجاً انھوں نے اپنے عہدے سے استعفیٰ دے دیا۔

کراچی پرنٹنگ پریس ایسوسی ایشن میں ذمہ داری

ستمبر 2021ء میں وفاقی وزیرِ خزانہ مفتاح اسماعیل کی جانب سے بجلی کے بلوں پر 6,000 روپے کے اضافی ٹیکس کے اعلان کے بعد ملک بھر میں احتجاجی تحریک کا آغاز ہوا، جس میں کراچی کی تاجر برادری نے بھی بھرپور شرکت کی۔

پاکستان چوک اور برنس روڈ کے پرنٹنگ پریس مالکان اس تحریک میں پیش پیش رہے۔ احتجاج کو منظم کرنے کے لیے کراچی پرنٹنگ پریس ایسوسی ایشن تشکیل دی گئی، جہاں تاجروں کے باہمی اتفاق سے محمد شاہ رخ فیروز قادری کو سپریم کونسل ممبر اور جوائنٹ سیکریٹری منتخب کیا گیا۔

(میم ٹی وی) کینیڈا کے کراچی اسٹوڈیو میں میزبانی

2020 ء میں محمد شاہ رخ فیروز قادری نے کینیڈا کے آئی پی ٹی وی چینل (میم ٹی وی) پر پروگرام “علمی مذاکرہ” کی میزبانی سے اپنے میڈیا سفر کا آغاز کیا۔ اس کے بعد انھوں نے (میم ٹی وی) پر متعدد دینی و فکری پروگرامز کی میزبانی کی، جن میں شامل ہیں:

علمی مذاکرہ (16 اقساط)

وقتِ سحر ٹرانسمیشن (29 اقساط)

اعلیٰ حضرت کے خلفاء (21 اقساط)

شانِ امام احمد رضا (3 اقساط)

(میم ٹی وی) کے مہمان (20 اقساط)

یہ تمام پروگرامز علمی، دینی اور فکری موضوعات پر مشتمل ہیں اور ناظرین میں خاصی مقبولیت حاصل کر چکے ہیں۔

📢 Join our WhatsApp Channel for latest news and updates! تازہ ترین اپڈیٹس کے لیے ابھی اُردو انسائیٹ کے وٹس ایپ چینل کو فالو کریں