.jpg)
لاہور میں انوکھا مقدمہ: جج کے چیمبر سے ’دو سیب اور ہینڈ واش‘ کی مبینہ چوری پر ایف آئی آر درج
.png "Unique case in Lahore: FIR registered for alleged theft of ‘two apples and hand wash’ from judge’s chamber")
پنجاب کے دارالحکومت لاہور میں ایک غیر معمولی واقعہ پیش آیا ہے جہاں سیشنز عدالت کے ایک جج کے چیمبر سے مبینہ طور پر دو سیب اور ایک ہینڈ واش کی چوری پر مقدمہ درج کر لیا گیا ہے۔
یہ مقدمہ لاہور کے تھانہ اسلام پورہ میں ایڈیشنل سیشنز جج نور محمد بسمل کے ریڈر کی مدعیت میں درج کیا گیا۔ ڈیوٹی آفیسر عمران خان کے مطابق انھیں یہ درخواست آپریشنز ونگ کی جانب سے موصول ہوئی تھی، جس پر نہ صرف مقدمہ درج کیا گیا بلکہ مکمل ریکارڈ مزید کارروائی کے لیے انویسٹیگیشن ونگ کے حوالے بھی کر دیا گیا ہے۔
ایف آئی آر کے مطابق چوری کی یہ واردات پانچ دسمبر کو پیش آئی، جس میں مجموعی طور پر ایک ہزار روپے مالیت کے دو سیب اور ایک ہینڈ واش چوری کیے گئے۔ ریڈر نے اپنے بیان میں بتایا کہ ایف آئی آر درج کرانے کی ہدایت انھیں خود جج صاحب نے دی تھی۔
لاہور پولیس نے یہ مقدمہ تعزیراتِ پاکستان کی دفعہ 380 کے تحت درج کیا ہے، جو احاطۂ خانہ میں چوری کے جرم سے متعلق ہے۔ اس دفعہ کے تحت چوری ثابت ہونے پر ملزم کو سات سال قید، جرمانہ، یا دونوں کی سزا ہو سکتی ہے۔
📢 Join our WhatsApp Channel for latest news and updates! تازہ ترین اپڈیٹس کے لیے ابھی اُردو انسائیٹ کے وٹس ایپ چینل کو فالو کریں