قیمتی پتھروں سے متعلق افواہیں بے بنیاد، چین کا وضاحتی بیان — پاک چین تعلقات میں بدگمانی پیدا کرنے کی کوشش ناکام

 قیمتی پتھروں سے متعلق افواہیں بے بنیاد، چین کا وضاحتی بیان — پاک چین تعلقات میں بدگمانی پیدا کرنے کی کوشش ناکام

بیجنگ (نیوز ڈیسک) چین نے واضح کیا ہے کہ قیمتی پتھروں سے متعلق پھیلائی جانے والی افواہیں بے بنیاد ہیں اور ان کا مقصد پاک چین تعلقات میں بدگمانی پیدا کرنا ہے۔

چینی وزارتِ خارجہ کے ترجمان لن جیان نے کہا کہ ریئر ارتھ (نایاب ارضیاتی معدنیات) اور دیگر متعلقہ اشیاء پر عائد کی گئی حالیہ برآمدی پابندیاں پاکستان سے کسی بھی طرح منسلک نہیں ہیں۔

ترجمان کے مطابق، پاکستانی رہنماؤں نے امریکی حکام کو جو معدنی نمونے دکھائے یا پیش کیے تھے، وہ دراصل خام قیمتی پتھروں کے نمونے تھے جو ان کے عملے نے ذاتی طور پر خریدے تھے۔ انہوں نے کہا کہ “یہ رپورٹس یا تو حقائق کی غلط تشریح پر مبنی ہیں، یا افواہوں پر، یا پھر چین اور پاکستان کے درمیان بداعتمادی پیدا کرنے کی دانستہ کوشش ہیں، جو بالکل بے بنیاد ہیں۔”

لن جیان نے مزید کہا کہ چین کی برآمدی پالیسیوں کا مقصد عالمی امن، علاقائی استحکام اور عدم پھیلاؤ کے بین الاقوامی وعدوں کی پاسداری ہے۔

انہوں نے اس بات پر زور دیا کہ چین اور پاکستان کے تعلقات باہمی اعتماد، دوستی اور تعاون کی مضبوط بنیاد پر قائم ہیں، جنہیں جھوٹے بیانیے سے کمزور نہیں کیا جا سکتا۔

📢 Join our WhatsApp Channel for latest news and updates! تازہ ترین اپڈیٹس کے لیے ابھی اُردو انسائیٹ کے وٹس ایپ چینل کو فالو کریں