یوں آدمی کو ، زمانے نے زیرِ دام لیا

غزل

شاعر: ڈاکٹر شوذب کاظمی

یوں آدمی کو ، زمانے نے زیرِ دام لیا

منافقت میں جیا اور ریا سے کام لیا

ہمیشہ ہم نے ، سسکتا ہوا نظام لیا

سو جو مقام لیا ، وہ برائے نام لیا

ہے لین دین کا ، بس یہ حساب اجمالاً 

وہ صبح و شام لٹایا جو صبح و شام لیا

کسی نے نام کمایا ، خدا خدا کر کے 

کسی نے خلق کا حق ، کر کے رام رام لیا

جہان بھر کی غلط بخشیوں کا کرتے بھی کیا

سو زیست  میں سدا ، خود سے ہی انتقام لیا

خدا کے بندوں سے کی ، نیکی جس نے اے شوذب

اسی کا نام جہاں نے بہ احترام لیا

📢 Join our WhatsApp Channel for latest news and updates! تازہ ترین اپڈیٹس کے لیے ابھی اُردو انسائیٹ کے وٹس ایپ چینل کو فالو کریں